لسّاك نايم برْضٌه يامصرى
وعمّال تشكى تقول مظلوم؟
لأ ياحبيبي العمر بيجري
فوق من فضلك صحِّ النوم
اوعى الماضي يأثـّر فيك
واللا يهوّب من نواحيك
دا انت لمست السما بإيديك
راق الجو ماعادش غيوم
وبدَأتْ سنين الحرّية
وميلاد الأمّة العربية
وهَزَمْت الفتنة الوطنيّة
وبَنيت الوطن المهدوم
والثورة كتـَبتْ مواليدك
وتاريخها أصبحْ يوم عيدك
مصنوعة بفكرك وبأيدك
مدعومة بدعوة مظلوم
انفـُضْ كلّ غُبار الماضي
وخللىّ ضميرك حي وراضي
وانكر ذاتكْ قول يا بلادي
عمري ماهارضىَ أبات مهزوم
شـُق الأرض ولِفّ السّير
وازرع فيها تقاوي الخير
وابنى لحُبّك صرْح كبير
تلقى الرزق بينزل كوم
مصر بلدنا ورجعت لينا
بعد ماتاهت من حوالينا
فرحانة ومحتاجه إيدينا
بالعُقد اللولي الملضوم
محتاجة سواعد رجّالة
مش وقت الإيد البطالة
ولا ناقصة برامج وقُوالة
وجنابك غرقان في النوم