سادوا العدا
واتجمعوا الخونة على دم الوطن
وانا وانت الاتنين منحوتين ع الصخر
في دنشواي وف سينا وف بحر البقر
من كام سنة بتحلم وانا وحدي هنا
غرقان في وحل النيل
وخوفي والخرس
إن كامن هيامك في المدى
يحقن دماك
خدني معاك
يمكن أهيم زيّك وأهرب م الحرس
دا الليل فرد فيّا وفيك باعُه
وانا وانت صرنا يا صاحبي أتباعه
والكل طاطى
وليه أنا رافض
بعدن ما ضعنا
والبلاد ضاعوا؟
يا عنفوان الصبر
يا دم البرايا
يا دمع عين القلب
يا أَنْ الخلايا
يا جرح وسع البحر
مليان بالضحايا
لساك بتضحك
زي شجر التوت؟!
والخلق فيّا كل يوم بتموت
سارج حصانك فوق سواد الطين
من فتح مكة لمّا لفلسطين
يا سهم نافد في الحشا وداخل
أنا ليه بعاند وانت متاخد؟
جميز بلدنا فروعه ممتدة
فى القدس وف بغداد وف جدة
وجدوره واخدة فى وشها البشنين
م الفتنة واليرموك وم الرِدَّة
يا بلدنا يا اللي فى القلوب داخلة
انا ليه بعافر وانتي متّاخرة؟
ونسيتي سيفي
في بدر وف حطين؟
يا صاحبي قول لي
إن كنت انا مخاوي
أصحى وافوق
الطب بيداوي
أنا ليه بانام واصحى وانا مهزوم؟
وانت تقلّب في الهموم وتزوم
دارت علينا الدائرة دارت
والدنيا لينا بضهرها اندارت
وحصون بلدنا العاليه انهارت
وبقينا أسرى فى السنين الشوم
الشمس فى الصبح ترخي شعرها
ع النخل
والنخل بيمشّط الشَّعر الدهب بالسعف
والنهر ساكت
ومين يفهم عذاب النهر؟
وقلوع مراكب مسافره
من بداية الشهر
وولاد على الشط
جرّين اللبان ع الضهر
وجبل من الشرق بيسبّح فى عز الضهر
وشجر كتير ع الضفاف
بيناجي رب الدهر
يا منتهى القهر
ليه طعن الرجال فى الضهر؟
والليل طويل
أطول من القطر اللى رايح للصعيد
ومحملينه بالجثث
عكس اتجاه النهر والزمن البعيد
وانت اللى قاعد تحت دمع النخل
بتلم فى الطرح الصديد
حزنان يا طلع النخل خصبك منكسر
ولا فيش توافق بين حبوبك والمتاع المنتحر
والسعف مال
ولمس أنين الجذع
حوّط ع الحبوب بين ألف إيد
قالوا الوطن ليه مات وحيد؟
وليه ابتداء البعث يبدأ بالأنين
ولاّ انفلاق الحَب يحدُث
من نزول الروح على النبت الجنين؟
يا نخل آمنتك على الدم
اللى باقى ف الوريد
وأمنت ضلك ع الجراح الشقيانين
لمّا ابتدا النوح فى البلد
وبدت هموم الذل تنهش فى الولد
كنت الوحيد اللى امتلك
مليون عزيمه من الحديد
يا نخل باقى من ضياع الأمس قوم
طبطب على الجرح الجنون
طبطب على الجفن اللى كاتم دمعتك
بين كاف ونون
واقرا تراتيل الحياه
تكبر على كل الهموم
طبطب على النبتات
وهدهد طرحها لجلن تدوم
وافرح بضحكات البنات
والمعطيات
اللى طواها الغبن
عن أرضك وجات
ملضومة كيف الحَب
فى عقد النجوم
نادى المنادي فى البلد ع الناس تقوم
نص البلد قفل البيبان واتخمد
والنص طلّع ودنه بره الكون ونام
آه للأدان
وأهين على الريح لو تبان
متحملة بالغدر والسهم الجبان
نادى المنادي فى البلد
والنخل بينوّح
يا نخل لوّح بالجريد لوّح
الليل طويل ولا النهار روّح؟
والظلم زاد
ولا احنا بنسوّح؟
وليه نجوم الفجر غضبانه؟
وليه كلاب السبت فرحانه؟
واحنا اللى فى كل يوم
بنضيع ونتسوّح
يا نخل صُف الجريد
واقفل بيبان خوفك
دا انا المواوى العنيد
يا نخل فين شوفك؟
واقف على النيل وحيد
بتعد فى فروخك
ولا انت مهزوم جديد
والذل بحروفك؟
وانا المواوى اللى بانده في البلاد
يا نخل مين اللى وطّاك
وخلا قمتك فى الوحل؟
وطاك وتمتم عليك
وسط الردى والمهل
مطعون وناب الغدر فى ضلوعك
وانت المواوى والألم فدان
ماتوا الأحبّه وانت برجوعك
نلت المذله
والعذاب ألوان
وقت الأدان تتوضى بدموعك
والمستخبى فى الحشا بيبان
يا طول عذابك ضعت وبطوعك
والخلق لسّه بيحسبوك إنسان
انت المواوى والمدى ضيق
ومحملينك بالأسى والنوح
مكبوت وصوتك من ألم زيّك
ومصنفينك جسم من غير روح
انت المواوى والفؤاد نازف
عارف جروحنا ولا مش عارف؟
يا ابو العمايم والألم لافف
ناهش حشانا وانت مش شايف
يا ابو العمايم كلنا فى الصف
واقفين فرادى والعدا فى الخلف
وبلدنا توهة والطوفان جارف
وبلدنا توهة
والطوفان جارف